Tech Forward Live 2026: SanTech yaguye amayira y’ubushakashatsi n’ikoranabuhanga rigezweho mu Rwanda
SanTech yatangije “Tech Forward Live Day 2026” igamije guhuza abanyeshuri n’inganda mu ikoranabuhanga.
Ikigo cy’ikoranabuhanga San Tech (Smart Applications and Networking Technology) cyatangije ku mugaragaro igikorwa cyiswe Tech Forward Live Day 2026, igamije guhuza abanyeshuri, abashakashatsi n’abashoramari mu rwego rwo guteza imbere udushya mu ikoranabuhanga.
Uyu muhango wabaye ku wa 6 Werurwe 2026 i Kigali witabiriwe n’abayobozi bo mu nzego zitandukanye zirimo iza Leta, amashuri makuru nazakaminuza ndetse abikorera, baganira ku ruhare rw’ikoranabuhanga mu guteza imbere ubukungu no guhanga imirimo mishya ku rubyiruko.
Iki gikorwa cyari gifite insanganyamatsiko igira iti “From Ideation to Transformative Impact”, bisobanura guhindura ibitekerezo byoroheje bikavamo imishinga ifatika ifasha sosiyete.
Uko igikorwa cyatangiye:
Umuhango watangijwe n’umusangiza w’amagambo Deo Ujyamubandi wakiriye abitabiriye barimo abahagarariye inzego zitandukanye z’igihugu n’ibigo by’amashuri makuru.
Mu bari bitabiriye harimo abaturutse muri kaminuza y'u Rwanda (UR), Minisiteri y'uburezi (MINEDUC) na Minisiteri y'ikoranabuhanga (MINICT) ndetse n’abandi bayobozi bo mu nzego za Leta n’iz’abikorera.
Hari kandi abari bahagarariye ingabo z'u Rwanda (RDF), ibigo by’ubushakashatsi n’inganda, ndetse n’abantu ku giti cyabo bafite uruhare mu guteza imbere ikoranabuhanga mu Rwanda.
Ikibazo cy’ubushomeri mu rubyiruko:
Mu ijambo ry’ikaze, umuyobozi ushinzwe ibikorwa muri SanTech, Claudine Niyonzima, yagaragaje ko ikibazo cy’ubushomeri mu rubyiruko ari kimwe mu bibazo bikomeye Afurika 'u Rwanda muri rusange duhura na byo.
Yagaragaje ko Abasaga 23% by’urubyiruko muri Afurika badafite akazi, 30% by’abarangiza kaminuza bakora imirimo batize, ni mu gihe 18% bamara umwaka wa mbere nyuma yo kurangiza amasomo badafite akazi.
Yagize ati:“Iki ni ikibazo gikomeye Afurika ifite, ariko nanone urubyiruko ni rwo rufite ibisubizo. Ni yo mpamvu turi hano uyu munsi.”
Yavuze ko nubwo ikoranabuhanga ryigishwa cyane mu mashuri makuru, hari ikibazo cyo kuba ridashyirwa mu bikorwa mu buryo bufatika bushobora kubyara imirimo n’ibisubizo ku bibazo byugarije sosiyete.
Amavu n'amavuko ya San Tech:
Niyonzima Claudine yasobanuye ko igitekerezo cyo gushinga SanTech cyavutse mu 2019 ubwo we na mugenzi we bari abanyeshuri muri kaminuza y'u Rwanda, ishami ry'ikoranabuhanga rahoze ari KIST ubu ryitwa College of Science and Technology (CST-UR) i Nyarugenge.
Ubwo basozaga amasomo yabo, babonye ikibazo cy’uko ibigo byinshi byifashishaga ibitabo byandikwamo abashyitsi n'abandi bose binjira mu bigo runaka, bigatera gutinda kuri uwo murongo cyangwa kwa serivise, kubura amakuru cyangwa no kuyatakaza.
Ni bwo batangije umushinga w’ikoranabuhanga witwa E-Visitors System (EVS).
Iyi sisitemu ikoresha imashini isoma indangamuntu, pasiporo, perime cyangwa ikindi cyangombwa cyose kiba kibitse amakuru y'imyirondoro y'umuntu, ikandika amakuru y’umushyitsi mu buryo bw’ikoranabuhanga mu masegonda make, bityo igasimbura uburyo bwo kwandika mu bitabo by’impapuro bwatindaga kandi bufite n'ibindi byago.
E-Visitors yakiriwe n’ibigo byinshi:
Uyu mushinga waje kwakirwa n’ibigo byinshi kubera koroshya uburyo bwo kwakira abashyitsi no kubika amakuru yabo mu buryo bw’ikoranabuhanga.
Kugeza ubu, SanTech ivuga ko ibigo birenga 40 mu Rwanda bikoresha iyi sisitemu muri byo harimo, ibitaro n'amavuriro atandukanye ndetse na bimwe mu bigo by’abikorera
Mu 2019, uyu mushinga waje no gutsinda mu irushanwa rya Innovate for Industry Hackathon ryateguwe n'ikigo cy'igihugu gishinzwe ubushakashatsi ku iterambere ry'inganda (NIRDA), nyuma yaho iki kigo gifasha San Tech gukomeza kuwuteza imbere.
SanHub: Guteza imbere impano z’urubyiruko:
Uretse gukora ibisubizo by’ikoranabuhanga, SanTech yanashyizeho gahunda yitwa SanHub, igamije guteza imbere impano z’urubyiruko mu bijyanye n’ikoranabuhanga.
Iyi gahunda itanga amahugurwa mu bumenyi bugezweho burimo; Internet of Things (IoT), Artificial Intelligence (AI), Robotics
n’andi masomo ajyanye n’ikoranabuhanga rigezweho.
Kugeza ubu, abanyeshuri barenga 1,500 bamaze guhugurwa binyuze muri SanHub.
Muri bo: 56 bihangiye imirimo yabo, 30% batangiye imishinga yabo, 40% babonye buruse zo kwiga mu mahanga.
Tech Forward Live igamije guhuza amashuri n’inganda:
Abateguye Tech Forward Live bavuga ko iki gikorwa kigamije guhuza abanyeshuri bari mu mashuri n’abakora mu nganda n’ikoranabuhanga.
Binyuze muri uru rubuga, abanyeshuri babona uburyo bwo kwerekana imishinga yabo, bakaganira n’abashoramari ndetse n’abafata ibyemezo bashobora kubafasha kuyishyira mu bikorwa.
Abateguye iki gikorwa bavuga ko kizajya kiba buri mwaka, kikaba urubuga rwo guteza imbere udushya n’imishinga mishya mu ikoranabuhanga.
Abayobozi bashimye uruhare rw’urubyiruko
Mu bagize icyo bavuga kuri iyi gahunda, harimo umuyobozi w’ishami ry’ikoranabuhanga muri kaminuza y'u Rwanda, Prof. Richard Musabe, washimye Claudine Niyonzima na Pacifique Shema ku rugero batanze.
Yavuze ko umushinga wa E-Visitors watangiye nk’ubushakashatsi bw’abanyeshuri, ariko bikarangira ubaye igisubizo gifatika gikoreshwa mu bigo byinshi.
Mu ijambo rye, uwahoze ari Minisitiri w’Intebe Pierre Damien Habumuremyi, wari uhagarariye Tito Rutaremara, yashimye urubyiruko rukomeje guhanga udushya mu ikoranabuhanga.
Yagize ati: “Uyu munsi turi kubona igisekuru gishya cy’abana bacu bakoresha ikoranabuhanga mu buryo butandukanye cyane n’igihe twakuriyemo.”
Mu gusoza uyu muhango, Umuyobozi mukuru wa SanTech yashimiye abitabiriye igikorwa bose ndetse anashimira abafatanyabikorwa batandukanye bagize uruhare mu gutuma Tech Forward Live ibaho.
Yavuze ko SanTech izakomeza guteza imbere udushya mu ikoranabuhanga no gufasha urubyiruko guhindura ibitekerezo byabo imishinga ifatika.
Imishinga y'ikoranabuhanga ikomeje guhindura isura y'u Rwanda mu ruhando mpuzamahanga binyuze mu kwaira ibirori n'inama zitandukanye zigaruka ku ikoranabuhanga muri rusange.
